NÛÇEYÊN SEREKE YÊN ROJANE    

–ROJAVAYÊ KURDISTAN Û SÛRÎ:

 

* Li eniya Melah a rojavayê bajarê Helebê di navbera hêzên rêjîma Baas û çeteyên Tirkiyê de, li eniya Komeleya Zehra ya rojavayê bajêr jî, di navbera hêzên rêjîmê û komên çete de, pevçûnên dijwar rû da.Di encamê de li bajaroka Biyanûn hejmarek sivîl birîndar bûn.

 

* Çeteyên Cebhet EL-Nusra û Ehrar EL-Şam gundên navçeya Şêrewa ya Kantona Efrînê bi fozeyan û çekên giran bombebaran kir. Di encamê de, zerar gihîşt mal û milkên welatiyan. Şervanên YPG û YPJ`ê jî bersiva êrîşan dan û êrîşa çeteyan têk çû.

 

* Hevserokê PYDê Salih Muslim di hevpeyvîna xwe ya rojnameyê de ragihand ku hevpeymaniya Îran, Qetar û Tirkiyeyê bûye sedema kuştina gelek civanên kurd.

 

* li rojhilat û rojavayê Reqqayê şer û pevçûnên dijwar diqewimin. 3 jê emîr 22 milîtanên rêxistina terorîst a DAIŞê hatin kuştin.

 

* Li taxa Battanî ya rojhilat û li taxên El Berîd û Hattîn ên rojavayê Reqqayê ji 16 Gulanê de şer bi dijwarî didome. Di şer de heta niha 38 çete hatine kuştin. Şervanên QSD’ê li rojava ketin taxa Qedîsiyê.

 

* çeteyên artêşa Tirk a dagirker gundên Semoqa, Til Medîq, Til Çîçan, Hirbel û Bendava Şabhayê yên girêdayî herêma Şahbayê, bi çekên giran topbaranan kirin.

 

–BAKURÊ KURDISTAN Û TIRKÎ:

 

* Erdogan serokomarê Tirkiyê, Komara Îslamî ya Îranê welatekî girîng û bibandor li navçeya Rojhilata Navînê da zanîn û got: “Em nikarin qeyranên navçeyê bêyî amadebûna Îranê çareser bikin.

 

* Li 39 gundên navçeyên Licê, Hezro û Karazê yên Amedê qedexeya derketina derve hat ragihandin.

 

* Wezîrê Karên Derve yên Amerîka Rex Tillerson, ser biryara girtina 12 parêzvanên Tirk yên li pêş balyozxaneya Tirk êrîşî xwepêşanderên Kurd kiribûn daxuyanî da.‘’Biryara girtinê ya jibo 12 parêzvanên Tirk, bi awayekî eşkere nîşan dide ku Amerîka, kesên li dijî azadîya beyanê û îfadeya sîyasî ya rewa rêkên tundûtûjîyê bi kar tînin qebûl nake’

 

–BAŞÛRÊ KURDISTAN Û IRAQ:

 

* Rayedarekî nêzîkî serokwezîrê Iraqê diyar kir ku serokwezîrê vî welatî Heyder Ebadî sefera xwe ya Erebistanê ku biryar bû bi zûtî pêk were paşda xist da ku kes fikir neke ku Iraq pişta aliyeke krîza pêkhatî di navbera welatên erebî li Kendava Farsê de digire.

* Neteweyên Yekbûyî diyar kir 100 hezar xelkê medenî li navenda Mûsilê di destê DAIŞ’ê de heye û DAIŞ wana weke mertalên zindî bikartîne.

 

* Di 6 mehên destpêkê yên sala 2017’an de li Iraqê 7 rojnameger hatine kuştin.

 

–ROJHULATÊ KURDISTAN Û IRAN:

 

* Berdevkê Wezareta Derve ya Îranê Behram Qasimî bersiv da gotinên Wezîrê Derve yê Amerîkayê Rex Tillerson ku gotibû, “Em piştevanîya komên ku li Îranê guherîna rejîmê dixwazin dikin. Û got, “Ev bi awayekî eşkere destwerdan e û binpêkirina rêzikên navntewî ye.”

 

* Alîkarê Leşkerî yê Ayetullah Elî Xaminêyî yê Rêberê Îranê, Yehya Rehîm Sefewî ragihand, ku eger Amerîka êrişî Îranê bike, ew dê tevahia binke û baregehên serbazî yên Amerîkayê yên li deverê ji nav bibin.

 

–CÎHAN:

 

* Wezîrê Derve yê Rûsyayê Sergey Lavrov,destnîşan kir, li deverên ku sîstema moşekên HIMMARSê tê bicîkirin armancên DAIŞê tune ne, lewma jî dibe ku mebesta Amerîkayê qutkirina pêwendîya arteşa Sûrîyê ya bi Iraqê re be.

 

 

* Keştiyên şer ên Amerîkayê bo beşdarî tetbîqata hevpar bibin çûn keştîgeha li Dohayê. Wezaretên Parastinê yên Amerîka û Qeterê peymana bi bihayê 12 mîlyar dolarî bo firotina balafirên şer F-15ê li hev kirin. Li gorî Bloombergê Amerîka 36 balafirên şer difroşe Qeterê.

 

17.06.2017

Rojev24