Sewal û xwezayê jî qetil dikin!

EFRÎN – Endamê Komîteya Çandiniyê ya girêdayê Meclîsa Aborî ya Kantona Efrînê Eyup Muhemed ku eslê xwe Ereb e, diyar kir ku di êrîşa dewleta tirk a dagirker a li ser Efrînê jibilî şûnwarên dîrokî û cihên pîroz, ji 145 hezar sewalan sedî 50’ê wê ji aliyê komên çeteyan ve hatine talankirin û sedî 40 darên zeytunan jî ji ber bombebarana balafir û topbaranan hatine wêrankirin û gelek jî ji qurmê ve hatine rakirin.

Êrîşa dewleta tirk a dagirker û komên çete yên girêdayên wê ya li ser Efrînê di roja xwe ya 38’emîn de berdewam dike. Hêzên Sûriya Demokratîk (QSD) ku pêşengtiya wan YPG/YPJ dikin bi “Berxwedaniya Serdemê” re, rê nadin dagirkeriyê. Leşkerên Artêşa Tirk (TSK) û komên çete yên di bin navê Artêşa Azad (ASA), jibilî şûnên jiyanî, şûnwarên dîrokî, çand û xweza jî armanc digirin.

Li Efrînê di 7 cebheyan de di navbêra hêzên QSD û TSK û ASA’yan de şer û pêvçûnên dijwar diqewimin. Leşkerên tirk û komên çete ku nikarin berxwedaniyê bişkênin serî hemû rê û rêbazan didin. Leşkerên dewleta tirk û komên girêdayên wî di êrîşên ku gelek çekên giran tên şixûlandin de di gundên sînor ên dagir kirine de talaniyê dikin, di van êrîşên heta niha de sewal û darên zeytunan jî nesîbê xwe girtin e. Hat diyarkirin ku ji 140 hezar pez û 5 hezar jî dewar sedî 50’î hatine telefkirin û dizîn, ji 20 milyon zeytunan jî sedî 40’ê wê hatine talankirin.

Ji darên zeytunan sedî 40’î…

Endamê Komîteya Çandiniyê ya girêdayê Meclîsa Aborî ya Kantona Efrînê Eyup Mihemed ku eslê xwe ereb a ji Efrînê ye, wek Komîteya Çandiniyê lêkolîna xwe ya derbarê mijarê de ji me re parve kir. Mihemed, diyar kir ku ji ber van êrîşan yek ji wan kesan ê herî zêde zirarê ditiye gelê Ereb e. Mihemed, da zanîn ku di van êrîşan de bi sedan hatin qetilkirin û ewqas jî hatin birîndar kirin û wiha got: “Ne tenê mirovan dikujin di heman demî de zirarek mezin didin xwezayê jî. Sewalan, dar û şûnwarên dîrokî û pîroz bombe dikin. Me pir zirar dît. Di kantona me de nêzî 20 milyon darên zeytunan heye. Ji van daran sedî 40 bi bombebarana asîman û topbaranan hatin talankirin. Dar hatin şewitandin û ji qurm (kok) hatin rakirin. Li Cindirisê, Reco, Bilbilê, Şiyê, Mabeta û Şera xweza jî tê qetilkirin. Li Efrînê ne tenê darên zeytunan ew darên fêkiyê yên din jî tên tunekirin.”

Sewalan û xwezayê tehdît dikin

Mihemed, destnîşan kir ku jibilî wê sewal jî tên qetilkirin û ev agahî dan: “Li Efrînê nêzî 140 hezar pez û 5 hezar jî dewar hene. Ji van sewalan sedî 50’î jî hatin qetilkirin û talankirin. Ji van sedî 25 di encama êrîşan de telef bûne, sedî 25 jî ji aliyê çeteyan ve dest danîne ser wan. Sewalan dibin li Ezaz û Kilîsê difroşin. Yên qaşo dibêjin ‘em tên gel rizgar dikin’ tiştê dikin ev e, qetilkirin, dizî û talanî ye. Bila vê hemû gelên me û cîhan zanibin. Em wan di axa xwe de naxwazin. Ew ji bilî mirinê tiştekî ji me re nayinin. Feraseta wan xwezayê tehdît dike.”

26.02.2018

Rojev24