LEZGÎN
الرئيسية / Nûçe / Li dijî serhildana Şêladizê PDK û MÎT civîn organîze kirin

Li dijî serhildana Şêladizê PDK û MÎT civîn organîze kirin

NAVENDA NÛÇEYAN -Hefteyek borî gelê Şêladizê li hemberî baregeha leşkerî ya dewleta Tirk derketin û wesayîtên leşkerî jî şewitandibûn. Piştî vê serhildanê PDK, li ser navê gel lêborîna xwe ji dewleta Tirk xwest. Hin rayedarên PDK’ê ji bo ku xwe li ber dilê Tirkan xweş bikin, hin daxuyaniyên sosret dan. Piştî van daxuyaniyan dora bajar û navçeyên Şêladizê û Amêdiyê hatin girtin. Ji bo girtina çalakgeran operasyonek hatibû destpêkirin û heta niha 130 kes hatine destgîrkirin.

Piştî ku endamên YNK û Goranê hatin girtin, ev partiyan têkilî bi PDK’ê re danîn û endamên wan hatin berdan. PDK’ê endamên Tevgera Azadî berneda û gef li eşîran xwar. PDK’ê bi darê zorê xwest ev kesên ku hatine destgîrkirin li dijî Tevgera Azadiyê ya Kurdan bide axaftin û ev tişt li ser medyaya civakî belav kir û wekî AKP’ê xwest meseleyê berevajî bike.

PDK’ê tevî MÎT’ê meşek organîze dike

PDK û MÎT’a Tirkan li herêmê hewl didin li dijî Tevgera Azadiyê ya Kurdan lîstikeke qirêj pêk bîne. Li gorî agahiyên ku hatine bidestxistin, PDK û MÎT’ê li herêmê bi sedan kes destgîr kir û bi darê zorê xwest wan bide axaftin. Piştî ku vê tevgera wan bi ser neket, niha jî gefan li eşîrên li Şêladizê, Amediyê û Dêrelokê dixwe. Tê diyarkirin ku eşîrên ku gef li wan hatiye xwarin, zext li ser wan tê kirin ku tevlî meşa li dijî gerîlayên Kurdistanê bibin û yên ku tevlî vê meşê nebin ew ê bi darê zorê ji malên xwe werin girtin.

Eşîra Rêkanî gef li wan tê xwarin

Tê diyarkirin ku PDK û MÎT ji bo meşa li dijî gerîlayên PKK’ê herî zêde gefan li eşîra Rêkanî dixwe. 4 endamên eşîra Rêkanî di êrîşa dewleta Tirk a di 23’ê Çileyê de ya li herêma Reşwa ya Dêrelokê hatibû qetilkirin. Piştre gelê Şêladizê li dijî baregeha dewleta Tirk serî hildabû.

Sedemên dîrokî hene ku PDK û MÎT gefan li eşîra Rêkanî dixwin. Di navbera eşîra Rêkanî û malbata Barzaniyan de ji salên 1960’î de nakokî hene. Di sala 1961’ê de Mistefa Barzanî hemberî Abdulkerîm Kasim pişta Abdulselam Arif digire. Piştî vê nakokiyê PDK gundên Rêkaniyan dike hedef.

Ji Dêrelok, Bamernê û Şêladizê heta Ûrmiye û Şemzînanê 300 gundên eşîra Rêkanî ji aliyê PDK’ê ve tên valakirin. Beşeke eşîrê çûn Bexda, Mûsûl û Basrayê, beşeke eşîrê jî çûn Rojhilat û Bakur. Şerê di navbera PDK û eşîra Rêkaniyê heta salên 2003’an domiya. Di sala 2003’an de piştî ku DYE mudaxeleyî Iraqê kir, Mesût Barzanî li Hewlêrê mal da kesên ku mûxalifên wî ne. Yek ji van jî pismamê mî Ethem Barzanî ye û yê din jî serokê eşîra Rêkanî Mihemed Axayê Kelhê ye.

Herçiqas tê xuyakirin malbata Barzanî û eşîra Rêkaniyan li hev hatibin jî, piştî serhildana Şêladizê PDK vê eşîrê dike hedef û ev jî dide xuyakirin ku nakokî hê neqediyane.

MÎT nakokiya li başûr ji xwe re bikartîne

Di 2 sibatê de MÎT a Tirk û PDK’ê li Salona Dîlan a bajarokê Şêladizê civînek li dar xist. Kesên ku beşdarî civînê bûn agahî dan ajansa ANF’ê û gotin; “Hêzên PDK’ê bi zorê gelê navçeyê li salona Dîlan kom kir û daxwaz ji wan kir ku li dijî PKK’ê propagandayê bikin.”

Kesê beşdarî civînê bûyî û ji ber ewlehiyê nexwest navê xwe eşkere bike wiha got; “Destpêkê PDK’ê êrîşî gel kir û kêm kes tevlî civînê bûn. Di civînê de daxwaz hate kirin ku gel li dijî PKK’ê baxive û propagandayê bike. Mixtarên navçeyan û hêzên asayîşa zêrevanî beşdarî civînê bûn. Di civînê de Omer Oner li dijî PKK’ê axivî û got ‘Tu ferq û cûdahî di navbera PKK û DAÎŞ’ê de nîne’.”

Çavkaniyê wiha domand; “Omer Oner ji gel re got ew ê demê pêş li dijî PKK’ê çalakiyan lidarbixin û daxwaz ji gel kir ku beşdarî çalakiyan bibin. Di civînê de welatî li dijî gotinên berdevkê PDK’ê û MÎT’a Tirk Omer Oner derketin û nehiştin kesek baxive. Di civînê de tenê Oner axivî û bi gotinan êrîş bire ser eşîra Rêkanî.”

Hêjayî bibîrxistinê ye ku bi vê civînê re jî plana PDK’ê û MÎT a Tirk a li dijî Tevgera Azadiya Kurd eşkere dibe.

03.02.2019

Rojev24

شاهد أيضاً

Ji bo piştgiriya jinên malbatên xwe di şer de winda kirine, komeleyek hate vekirin

Komîteya Jinê ya Meclisa Malbatên Şehîdan a Bakur û Rojhilatê Sûriyê bi armanca piştgiriya jinên …

اترك تعليقاً